Muybridge é un dos grandes precursores do cinema, inxustamente esquecido pola historia, que se relacionou cos máis grandes inventores e pintores da súa época: Edison, Tesla, Rodin, Degas… Fascinado pola fotografía, un proceso técnico nos seus inicios, converteuse rapidamente nun dos fotógrafos máis famosos da súa época. Financiado polo home máis rico de Estados Unidos, logrou algo ata entón inédito: captar en película o percorrido dun cabalo ao galope.
Ao conseguir domar o movemento, Eadweard Muybridge convértese no primeiro home en deter o tempo; tamén, no primeiro home en proxectar unha película, moito antes que Edison e os irmáns Lumière; e no primeiro home declarado inocente tras matar a pelacorpo o amante da súa muller… Co seu estilo inconfundible, Delisle relata a invención da fotografía, o declive da pintura e o comezo do cinema.